Donostian bigarren eskuko liburuak erosteko dauden aukerei buruz idatzi ondoren, pertsona batek baino gehiagok Belartzako Emaus Elkarte Kooperatibaren EkoCenter zentroa (Auzolan kalea, 44 – mapa ikusi) bisitatzea gomendatu zion bookhunterblog-i, bai blogean komentarioak utziz baita zuzenean ere.

Horrela izanda, joan den asteko arratsalde euritsu batean, ateak ixteko ordua gertu zegoela (20.00etan ixten dute), bookhunterblog Belartzara joan zen eta bertan, altzairu, arropa eta bestelako bigarren eskuko gauzen artean, liburuak topatu zituen: liburuz betetako armairu erraldoia, itxura industrialeko instalazioaren pareta oso bat okupatzen zuena eta, alboan, liburuz estalitako mahaiak.

Klasikoak, eleberriak, manualak, saiakerak, kolekzioak, antzerkia… Denetatik dago Belartzan. Eta ziurrenik liburuak orden zehatz bat jarraituz antolatu dituztela, baina ordena asmatzea ez da erraza; argibide bezala, «novela» edo «novela rosa» bezalako inskripzioak duten kartel pare bat bakarrik daude. Beraz, «saltseatzeko» toki aproposa da, minutu batzuk bertan pasatzeko eta etxera liburu zahar batzuekin bueltatzeko.

EkoCenter-en liburuak bilatzen ari zirenen artean, denetarik zegoen: gurasoekin etorritako haurrak, altzairuak ikustera etorritako familiak, bildumagile itxurako helduak… Izan ere, armairu zehatz batean aintzinako liburuak daude, altxor txikiak. bookhunterblog-ek ez zuen kurioseatzeko nahi beste denbora eduki, (itxiera-ordua gertu zegoen eta), baina hiru liburu hauek aukeratzeko bai, behintzat:

Izena duen guztia omen da – Euskal Mitologia: Kutxak 2006. urtean argitaratu zuen liburu hau, Elena Odriozolaren 24 irudi jasotzen dituena, Euskal mitologiari buruzko artikulu luze batekin eta pertsonaia eta istorio nagusiei buruzko informazioarekin batera.

Los detectives salvajes – Roberto Bolaño: 2003. urtean hil zenetik, Txileko idazlea gaztelerazko literaturako izenik garrantzitsuenen artean dago. Kasu honetan, akzioa Mexikon gertatzen da, 70eko hamarkadan, eta «infrarrealismo» deritzon mugimenduaren omenaldi bezala irakurri izan da.

El gran Circo – María Molinari: 1960. urtean «Colección Popular Literaria»ren barnean argitaratutako liburua. 12 pezeta balio zuen garaian, eta nahiz eta gaur egun pixka bat garestiago izan, askorentzat liburu honek ekartzen dituen oroitzapenak ia ordainezinak izango dira.