Atzo egun eguzkitsua izan genuen Donostian Liburuaren Nazioarteko eguna ospatzeko. Urtero bezala, liburudenda eta argitaletxeek haien proposamenak aurkeztu zituzten Gipuzkoa plazako arkupeetan. Dagoeneko blog honetan agertu den Donostia Book Club-aren kideekin batera Pride and Prejudice liburuaren irakurketa publikoan parte hartu ondoren, bookhunterblog liburuen artean ikusmiran ibili zen.

Erein argitaletxearen txokoan Ioritz zegoen, Nur eta herensugearen tenplua irakurtzen. Toti Martínez de Lezeak idatzitako serieak arrakasta handia izan zuen atzo haurren artean.