Koldo Mitxelena Kulturuneak 20 urte bete ditu eta urteurrena ospatzeko hainbat ekintza antolatu dute egun hauetan. «Liburu bat, istorio bat» jarduera horietako bat da: guretzat garrantzitsua izan den liburua hautatzeko aukera ematen digu, eta beste irakurleekin partekatzeko.

Hiru era daude liburuak hautatzeko: Instagram erabiliz liburuaren argazki bat igo, proiektuaren helbidera (liburubatistoriobat@gmail.com) bidali, edo zuzenean Koldo Mitxelenan dagoen harrera-lekura gerturatu. Dagoeneko gehien aipatu diren liburuak? Le Petit Prince eta Cien años de soledad. Irakurleok aukeratutako liburuen bilduma fisikoa eskuragarri egongo da azaroaren 20tik aurrera.

«Liburu bat, istorio bat» kanpainaren harrera-lekuan Miren zegoen atzo arratsaldean. Bisitariek bere arreta eskatzen ez zuten uneetan, La rueda de la vida irakurtzen zuen, bizitza eta heriotzari buruzko liburua. Elisabeth Kübler-Ross da liburuaren egilea, eta Chicagon bizi den Mirentxu izeneko pertsona baten gomendioa da. Bere senarra hil zenean, egoera pairatzen lagundu zion liburu honek.

Zein da zure bizitzako liburua? Eta atzetik dagoen istorioa? Parte hartu!